HISTORY

ശ്രീ കാപ്പാട്ട് കഴകം, പയ്യന്നൂർ, കോലത്തുനാട്ടിലെ അതിപ്രാചീനമായ കഴകങ്ങളിലൊന്നാണ്. പയ്യന്നൂർ പെരുമാളുടെ സാന്നിദ്ധ്യംകൊണ്ട് പരിപാവനമായ പയ്യന്നൂരിൻറെ ഹൃദയ ഭാഗത്ത് നിന്ന് പടിഞ്ഞാറു മാറി നില്ക്കുന്ന കാപ്പാട്ട് കഴകം ഒരു ക്ഷേത്രസമുച്ചയമാണ്. പെരുമാളുടെ കാല്പാടുകൾ സ്പർശിച്ചതു കൊണ്ട് 'കാൽപാട്' എന്നും പിന്നീട് 'കാപ്പാട്' ആയി മാറിയെന്നും വിശ്വസിക്കുന്നു.
പെരുമാൾ സങ്കല്പമായി ഇവിടെ ആൽത്തറയുണ്ട്. അനുഷ്ടാന കർമ്മങ്ങൾ തുടങ്ങുന്നതിനു മുമ്പ് ആൽത്തറയിൽ ചെന്ന് പെരുമാളെ വന്ദിക്കുന്നു. സന്ധ്യാദീപപ്പൊലിമയിൽ അനന്യസാധാരണമായ ഭക്തിധാര ചൊരിയുന്നു. ക്ഷേത്രനടയിലൂടെ ഏതു ഈശ്വരവിശ്വാസിയും മനസ്സിൽ ധ്യാനിക്കാതെ കടന്നുപോകാറില്ല. പടിഞ്ഞാറു ഭാഗം തെങ്ങിൻതോപ്പുകളും നെൽവയലും നിറഞ്ഞതാണ്. ഈ പ്രദേശത്തെ കാപ്പാട്ട് കാവ് എന്നും പ്രദേശികമായി വിളിക്കുന്നു. ഇവിടത്തെ ആലവും ആലും തണലേകുന്ന തോടൊപ്പം ദേവസങ്കല്പങ്ങളുടെ സാക്ഷ്യങ്ങളായി നിലകൊള്ളുകയും ചെയ്യുന്നു. പിൻകാലങ്ങളിലെ നഗര വികസനത്തിലൂടെ ക്ഷേത്ര സമുച്ചയവും കഴകപ്പുരയും റോഡിൻറെ ഇരുഭാഗത്തുമായി മാറി. അതോടെ ക്ഷേത്രസങ്കേതത്തിൻറെ ഏകാത്മകത നഷ്‌ടപ്പെട്ടതു പോലെയാണ്.
ക്ഷേത്രത്തിൽ നാനാവിധ നവീകരണ പ്രവർത്തനങ്ങൾ അടുത്ത കാലത്തായി നടന്നു. വാസ്തുവിദ്യയുടെ പ്രവീണ്യം വിളിച്ചോതുന്ന ക്ഷേത്രക്കുളം, ദേവദേവീസാന്നിദ്ധ്യങ്ങളുള്ള പള്ളിയറത്തറകൾ, തിരുനട, പടിപ്പുര, അരിയറ (നിവേദ്യസാധനങ്ങളുടെ പാചകശാല) ശില്പവിദ്യപ്രകാരം നിർമ്മിച്ച ചുറ്റുമതിൽ മുതലായവ തയ്യാറാക്കപ്പെട്ടതോടെ കഴകത്തിന് വേണ്ട ഉപസർഗ്ഗങ്ങൾ സജ്‌ജമാക്കപ്പെട്ടു കഴിഞ്ഞു. 75 വർഷത്തിന് ശേഷമുള്ള അതി ബൃഹത്തായ പെരുങ്കളിയാട്ടത്തിൻറെ ആഘോഷത്തിമർപ്പിൽ കഴകവും അതിൻ പ്രാന്തപ്രദേശങ്ങളും നിമഗ്ഗമാണ്. ഉത്സവങ്ങളുടെ നാടായ കോലത്തുനാട്ടിൽ ഇന്നുള്ളവർക്കാർക്കും വ്യക്തമായി സ്‌മൃതി പഥത്തിൽ കേന്ദ്രീകരിക്കാൻ കഴിയാത്ത ഒരു മഹോത്‌സവമാണിത്. യാദവ രാജാക്കന്മാരാൽ ഭരിക്കപ്പെട്ടതായറിയുന്നു. ക്രിസ്തുവർഷം അഞ്ചാം ശതകത്തിൻറെ ആരംഭത്തിൽ കേരളത്തിൽ വലിയ മൂന്ന് രാജ്യങ്ങളുണ്ടായിരുന്നു. തെക്കെ അറ്റത്ത് ആയ്‌രാജ്യം മദ്ധ്യ ഭാഗത്ത് ചേരരാജ്യം വടക്കെ അറ്റത്ത് ഏഴിൽമല രാജ്യം. വടക്കെ മലബാറാണ് ഏഴിൽമലരാജ്യത്തിൽപെട്ടിരുന്നത്.